The Beauties of Burn's Poems/My Nannie O

by Robert Burns (1759-1796)

For other versions of this work, see My Nannie, O.

SONG.

Tune—My Nannie, O.

Behind yon hills where Lugar flows,
'Mang muirs and mosses many, O,
The wintry sun the day has clos'd,
And I'll awa to Nannie, O.
The westlin winds blaw loud and shrill,
And it's baith mirk and rainy, O;
I'll get my plaid, and out I'll steal,
And owre the hills to Nannie, O.

My Nannie's charming, sweet, and young
Nae artfu' wiles to win ye, O;
May ill befa' the flattering tongue
That wad beguile my Nannie, O.
Her face is fair, her heart is true,
As spotless as she's bonny, O;
The op'ning gowan, wat wi' dew,
Nae purer is than Nannie, O.

A country lad is my degree,
And few there be that ken me, O,
But what care I how few there be,
I'm welcome ay to Nannie, O.
My riches a's my penny fee,
And I maus guide it cannie, O;
But warl's gear ne'er troubles me,
My thoughts are a' my Nannie, O.

Our auld gudeman delights to view
His sheep and kye thrive, bonny, O;
But I'm as blythe that hauds his pleugh,
And has nae care but Nannie, O.
Come weel, come woe, I carena by,
I'll tak what Heav'n will sen' me, O;
Nae ither care in life hae I,
But live, and love my Nannie, O.

 

Divider from 'The Beauties of Burn's Poems' a chapbook printed in Falkirk in 1819