The Book of Scottish Song/A Lassie's Wonders

A Lassie’s Wonders.

[Edward Polin.—Here first printed.]

A' kin's o' lads an' men I see,
The youngest an' the auldest—
The fair, the dark—the big, the wee—
The blatest and the bauldest;
An' mony a laughin', canty ane,
An' mony a coxin sly man—
Hech sirs!—'mang a' the lads that rin,
I won'er wha'll be my man!

I won'er whar he is the noo—
I won'er gin he 's near me,
An' whar we'll meet at first, an' hoo,
An' whan he'll come to speer me.
I won'er gin he kens the braes,
The bonnie braes whar I ran—
Was't there he leeved his laddie days?
—I won'er wha'll be my man!

O gudesake! hoo I wish to ken
The man that I'm to marry,
The ane amang sae mony men:—
I wish I kent a fairy,
Or ony body that can see
A far'er gate than I can—
I won'er wha the chiel's to be—
I won'er wha'll be my man!

But losh na! only hear to me,
It's neither wise nor bonnie,
In asking wha the lad may be—
I'll maybe ne'er get ony;
But if for me indeed there's ane,
I think he's but a shy man
To keep me crying late an' sune
"I won'er wha'll be my man!"

---