The Book of Scottish Song/Blythe are we set

Blythe are we set.

[Written by Ebenezer Picken, a native of Paisley, whose poems were published at Edinburgh in 1813, in two small vols. He died in 1815 or 1816.]

Blythe are we set wi' ither;
Fling care ayont the moon;
Nae sae aft we meet thegither!
Wha wad think o' parting soon?
Though snaw bends down the forest trees,
And burn and river cease to flow;
Though nature's tide has shor'd to freeze,
And winter nithers a' below.
Blythe are we, &c.

Now, round the ingle cheerly met,
We'll scog the blast and dread nae harm,
Wi' jaws o' toddy reeking het,
We'll keep the genial current warm.
The friendly crack, the cheerfu' sang,
Shall cheat the happy hours awa',
Gar pleasure reign the e'ening lang,
And laugh at biting frost and snaw.
Blythe are we, &c.

The cares that cluster round the heart,
And gar the bosom stound wi' pain,
Shall get a fright afore we part,
Will gar them fear to come again.
Then, fill about, my winsome chiels,
The sparkling glass will banish pine:
Nae pain the happy bosom feels,
Sae free o' care as yours and mine.
Blythe are we, &c.

---