The Book of Scottish Song/Married the Morn

Married the Morn.

[Edward Polin.—Here first printed.—Air, "Woo'd an' married an' a'."]

O Freedom, you're muckle deservin'
A' the sangs that are sung in your praise,
An' me ye've been scrvin' an' servin'
A' the blythest an' best o' my days;
But we ne'er prize our pleasures eneuch
Till we see that frae us they'll be torn,
Sae I'm singing o' freedom the nicht.
For I'm to be married the morn.
Married at last the morn—
Buckled sae fast the morn;
Sae I'm singing o' freedom the nicht,
For I'm to be married the morn.

But I trow ye I wadna be buckled
Gin I saw it could otherwise be,
For I ken that whan twa folk are coupled
Nor ane nor the ither is free;
But that deil o' a lassie has wiled me—
She's witched me as sure as I'm born,
Wi' the glamour o' love she's beguiled me,
Sae I'm to be married the morn.
Married at last the morn—
Buckled sae fast the morn;
Wi' the glamour o' love she's beguiled me,
Sae I'm to be married the morn.

Already the lassie can guide me
To gae or to come at her ca',
Then what may I guess to betide me
Whan she rules wi' baith love an' the law;
But gudesake! it canna be helpit,
To mak' her my ain I ha'e sworn—
At the kirk a' the parish was tellt it,
Sae I'm to be married the morn.
Married at last the morn—
Buckled sae fast the morn;
At the kirk a' the parish was tellt it,
Sae I'm to be married the morn.

An' noo sin' it canna be better
We'll e'en mak' the best o't we can,
An' sin' for a wife I maun get her,
She just maun get me for a man;
We dinna ken what was intended—
We maybe for this o't were born;
An' noo, folk, my sang maun be ended,
For I'm to be married the morn,
Married at last the morn—
Buckled sae fast the morn;
An' noo, folk, my sang maun be ended,
For I'm to be married the morn.

---