The Book of Scottish Song/O wat ye wha

O wat ye wha.

[Alexander Laing.—Air, "Wat ye wha cam' here, lassie."]

O wat ye wha cam' here yestreen?
A lad that may fu' weel be seen!
My luck for gowd I wadna gi'e,
I'm just as blythe as blythe can be;—
His frien'ly bow, an' frank gude e'en,
He gied them baith to sister Jean;
But a' the time as I could see,
His kindly looks he gied to me.
His frien'ly look, &c.

I wadna gi'e his looks yestreen,
For a' the blythesome sights I've seen—
I've waited lang, an' wearied been,
But a' my fears were tint yestreen.
A father's house—a pantry fu'
O' meal to bake, and maut to brew;
They're nae to slicht nor cast awa',
But his kindly looks are worth them a'.
A father's house, &c.

---