The Book of Scottish Song/Oh, I lo'ed

Oh, I lo'ed.

[From "Poetical Remains of the late Robert Fraser, Editor of the Fife Herald," Cupar, 1839. Mr. Fraser died in 1839; he was a native of Pathhead in Fifeshire.]

Oh, I lo'ed my lassie weel,
How weel I canna tell—
Lang, lang ere ithers trow'd,
Lang ere I wist mysel'.
At the school amang the lave,
If I wrestled or I ran,
I cared nae for the prize
If she saw me when I wan.

Oh, I lo'ed my lassie weel,
When the gleesome days were gane,
'Mang a' the bonnie an' the gude
To match her saw I nane;
Though the cauld warl' o'er me cam'
Wi' its cumber an' its toil,
My day-tide dool was a' forgot
In her blythe e'enin' smile.

Oh, I lo'ed, nor lo'ed in vain,
An' though mony cam' to woo,
Wha to won her wad been fain,
Yet to me she aye was true;
She grat wi' very joy
When our waddin' day was set,
An' though twal' gude years sinsyne ha'e fled,
She's my darling lassie yet.

---