The Book of Scottish Song/The Widow's Dream

The Widow’s Dream.

[Thomas Dodd.—Here first printed.]

How sweet was my dream! When the morning did break on't,
The sun was a sad sight to me;
If frae that bright vision I never had waken'd,
My spirit wi' Jamie's wad be.

I thought, on the shore I sat wearily mourning,
The sun had sunk doun o'er the sea;
I saw Jamie's ship frae the Indies returning,
Wi' flags waving welcome to me.

I heard his clear voice in the sang they were singing,—
It cam' through my heart wi' a stound;
The tune o' that sang in my ear is yet ringing;
Sae pleasant, sae sweet, was its sound.

The sma' boat was lower'd, and they soon cam' to landing;—
How happy we met on the shore!
He gaz'd wi' that look that was aye sae commanding,
And smiled as he aye smiled before.

When press'd to his bosom, how fervent he bless'd me!
An' spak o' the joys we wad share;
He said, o'er an' o'er, as he fondly caress'd me,
"My Jeannie! we'll never part mair."

How fast fell my tears on his fast-beating bosom!
I couldna speak to him ava,
While, sabbing wi' joy that I'd never mair lose him,
I waken'd—and he was awa'!

---