The Book of Scottish Song/The unco Grave

The unco Grave.

[T. M. Cunningham.]

Bonnie Clouden, as ye wander,
Hills, an' heughs, an' muirs amang,
Ilka knowe an' green meander,
Learn my sad, my dulefu' sang!
Braes o' breckan, hills o' heather,
Howms whare rows the gowden wave:
Blissful scenes! fareweel for ever!
I maun seek an unco grave.

Sair I pled, though fate, unfriendly,
Stang'd my heart wi' waes and dules,
That some faithfu' hand might kindly
Lay't amang my native mools.
Cronies dear, wha late an' early,
Aye to soothe my sorrows strave,
Think on ane wha lo'es you dearly,
Doom'd to seek an unco grave.

Torn awa' frae Scotia's mountains,
Far frae a' that's dear to dwall,
Mak's my e'en twa gushin' fountains,
Sings a dirk in my puir saul.
Braes o' breckan, hills o' heather,
Howms whare row the gowden wave,
Blissfu' scenes, fareweel for ever,
I maun seek an unco grave!

---