The Book of Scottish Song/Young Donald
Young Donald.
[Written by George Allan. Set to Music by Peter Macleod.]
An eiry night, a cheerless day,
A lanely hame at gloamin' hour,
When o'er the heart come thoughts o' wae,
Like shadows on Glenfillan's tower.
Is this the wierd that I maun drie,
And a' around sae glad and gay,
Oh hon an righ, oh hon an righ,
Young Donald frae his love's away.
The winter snaw nae mair does fa',
The rose blooms in our mountain bower,
The wild flowers on the castle wa'
Are glintin' in the summer shower.
But what are summer's smiles to me
When he nae langer here could stay:
Oh hon an righ, oh hon an righ,
Young Donald frae his love 's away.
For Scotland's crown, and Charlie's right,
The fire-cross o'er our hills did flee,
And loyal swords were glancin' bright,
And Scotia's bluid was warm and free.
And though nae gleam of hope I see,
My prayer is for a brighter day:
Oh hon an righ, oh hon an righ,
Young Donald frae his love's away.