The Canary/Auld Langsyne

by Robert Burns (1759-1796)

For other versions of this work, see Auld Langsyne.

Auld Langsyne.

Tune—Sir Alexander Don's Strathspey.

Should auld acquaintance be forgot,
 An' never brought to mind;
Should auld acquaintance be forgot,
 An' days o' langsyne.
  For a' langsyne, my dear;
   For auld langsyne;
  We'll tak a cup o' kindness yet,
   For auld langsyne.

We twa hae run about the braes,
 An' pu'd the gowans fine;
But we've wander'd mony a weary fitt
 Sin' auld langsyne.
  For auld langsyne, &c.

We twa hae paidelt in the burn,
 When simmer days did shine,
But seas between us braid hae roar'd
 Sin' auld langsyne.
  For a' langsyne, &c.

An' there's a hand my, trusty friend,
 An' gies a claught o' thine,
An' we'll toom the cup to Friendship's growth
 An' auld langsyne.
  For auld langsyne, &c.

An' surely ye'll be your pint-stoup,
 As sure as I'll be mine,
An' we'll take a right gudewillie waught
 For auld langsyne.
  For auld langsyne, my dear,
   For auld langsyne,
  We'll tak a cup o' kindness yet,
   For auld langsyne.