The Duke of Gordon's Daughters (1823)/Leeze Me On My Spinning Wheel

by unknown author

---

LEEZE ME ON MY SPINNING WHEEL

O leeze me on my spinning wheel,
And leeze me on my rock and reel,
Frae tap to tae that cleeds me bien,
And haps me feil and warm at e'en,
I'll sit me down, and sing and spin,
While laigh descends the simmer's sun:
Blest wi' content, and milk and meal
O leeze me on my spinning wheel.

On ilka hand the bairnies trot,
And meet below my theekit oot:
The scented birk and hawthorn white
Across the pool their arms unite,
Alike to screen the birdie's nest,
And little fish's caller rest;
The sun blinks kindly in my biel,
Where blythe I turn my spinning wheel.

On lofty aiks the cushats wail,
And echo cons the dolefu' tale;
The lintwhites in the hazel braes,
Delighted rival ither's lays:
The craik amang the clover hay,
The pairtrick whirring o'er the ley,
The swallow jinkin' round my shiel,
Amuse me at my spinnin' wheel.

Wi' sma' to sell, and less to buy,
Aboon distress below envy;
O! wha wad leave this humble state,
For a' the pride of a' the great?
Amid their cumb'rous dinsome joys,
Can they the peace and pleasure feel,
Can they the peace and pleasure feel,
Of Betsy at her spinning wheel.

 

FINIS.