The Historye of Reynard the Foxe/capitulo .ii.

The first complaynt made Isegrym the wulf on Reynart
capitulo .ii.

Isegrym the wulf wyth his lynage and frendes cam and stode to fore the kynge / And sayde hye and myghty prynce my lord the kynge I beseche yow that thurgh your grete myght / ryght / and mercy that ye wyl haue pyte on the grete trespas and the vnresonable mysdedes that reynart the foxe hath don to me and to my wyf that is to wete he is comen in to my hows ayenst the wylle of my wyf / And there he hath be pyssed my chyldren where they laye in suche wyse as they therof been woxen blynde / wherupon was a day sette / and was judged that reygnart sholde come and haue excused hym hierof / and haue sworen on the holy sayntes that he was not gylty therof / And whan the book wyth the sayntes was brought forth / tho had reygnart bythouht hym other wyse / And wente his waye agayn in to his hole / as he had nought sette therby / And dere kynge this knowen wel many of the bestes that now be comen hyther to your court / And yet hath he trespaced to me in many other thinges / he is not lyuyng that coude telle alle that I now leue vntolde / But the shame and vyllonye that he hath don to my wyf / that shal I neuer hyde ne suffre it vnauengyd but that he shal make to me large amendes /