In Scotland there lived a humble Beggar, He had neither house, nor hauld, nor hame, But he was well liked by ilka bodie, And they gae him sunkets to rax his wame.
A nivefow o’ meal, and a handfow o’ groats, A dadd o’ bannock, or herring brie, Cauld parrage, or the lickings o’ plates, Wad made him as blyth as a beggar cou’d be.
This Beggar he was a humble Beggar, The scint a bit o’ pride had he, He wad a ta’en his a’ms in a bikker, Frae gentleman, or poor bodie.
His wallets a-hint and a-fore did hang, In as good order as wallets cau’d be: A lang kail-gully hang down by his side. And a meikle nowt-horn to rout on had he.
It happened ill, it happened warse, It happened sae, that he did die: And wha do ye think was at his late-wake, But lads and lasses o’ high degree.
Some were blyth, and some were sad. And some they play’d at blind Harrie; But suddenly up-started the auld Carle, I redd ye, good fowks, tak tent o’ me.
Up gat Kate that sat i’the nook, Vow Kimmer, and how do ye? Up he gat, and ca’d her a Limmer, And ruggit and tuggid her cockernonie.
They houkit his grave in Duket’s kirk-yard, E’en far frae the companie; But whan they were gawn to lay’n i’the yird, The feint a dead nor dead was he.
And whan they brought him to Duket’s kirk-yard, He dunted on the kist, the boards did flie, And whan they were gawn to put’m i’the yird, In fell the kist, and out lap he.
He cry’d, I’m cauld, I’m unca cauld, Fu’ fast ran the fowk, and fu’ fast ran he: But he was first hame at his ain ingle side, And he helped to drink his ain dirgie.
_-_rule_1.png)