The Kail Brose of Auld Scotland (Stirling)/Cauld Kail in Aberdeen

by Anonymous

For other versions of this work, see Cauld Kail in Aberdeen (unknown).

CAULD KAIL IN ABERDEEN.

There’s cauld kail in Aberdeen,
And castocks in Stra’bogie,
Where ilka lad maun hae his lass,
But I maun hae my cogie.
But I maun hae my cogie, troth,
I canna want my cogie
I wadna gie my three-gird cog,
For a’ the wives in Bogie.

Johnny Smith has got a wife,
Wha scrimps him o’ his cogie;
But were she mine, upon my life,
I’d duck her in a Bogie.
For I maun hae my cogie, troth,
I canna want my cogie,
I wadna gie my three gird cog,
For a’ the wives in Bogie.

Twa or three todlin weans they hae,
The pride o' a' Stra’bogie,
Whene’er the totums cry for meat,
She curses ay his cogie;
Crying, “Wae betide three-gird cog,
“Oh wae betide the cogie,
"It does mair skaith than a’ the ills,
“That happen in Stra’bogie.”

She fand him ance at Willie Sharp’s;
And, what they maist did laugh at,
She brake the bicker, spilt the drink,
And tightly gowff’d his haffet.
Crying, “Wae betide the three-gird cog,
“Oh, wae betide the cogie!
“It does mair skaith than a’ the ills,
“That happen in Stra’bogie.”

Yet here’s to ilka honest soul,
We’ll drink wi’ me a cogie;
And for ilk silly whingin fool,
We’ll duck him in a bogie.
For I maun hae my cogie, Sirs,
I canna want my cogie;
I wadna gie my three-gird cog,
For a’ the queans in Bogie.

---