The Lament of Flora M'Donald/The Lords Marie

by Anonymous

THE LORD'S MARIE.

The Lord's Marie has kepp'd her locks
Up wi' a gowden kame,
An' she has put on her net-silk hose,
An' awa to the tryste has gane.
O saft, saft, fell the dew on her locks,
An' saft, saft, on her brow;
Ae sweet drap fell on her strawberry lip,
An' I kiss'd it aff I trow:

"O whar gat ye that leal maiden,
“Sae jimpy lac'd and sma'?
“O whar gat ye that young damsel,
“Wha dings our lasses a'!
"O whar gat ye that bonnie, bonnie lass,
"Wi' heaven in her e'e?
"O here's ae drap o' the damask wine,
"Sweet maiden, will ye pree?"

Fu' white, white was her bonnie neck,
Twist wi' the satin twine,
But ruddie, ruddie grew her hawse,
While she sipp'd the bluid-red wine.
"Come here's thy health young stranger fair,
"Wha wears the gowden kame—
"This night will mony drink thy health,
"And kenna wha to name."

Play me np Sweet Marie," I cry'd,
And loud the Piper blew—
But the Fiddler play'd ay struntum strum,
An' down his bow he threw,
"Here's thy kin' health i' the ruddie red wine,
"Fair dame o' the stranger land!
"For never a pair o' een before
"Could mar my gude bow hand."

Her lips were a cloven hinney cherrie,
Sae tempting to the sight;
Her locks, owre alabaster brows,
Fell like the morning light,
An' light her hinney breath heav'd her locks,
As thro' the dance she flew;
While love laughed in her bonny blue ee,
An' dwelt on her comely mou.

"Loose hings ye're broider'd gowd garter,
"Fair lady, dare I speak?"
"She, trembling, lift up her silky band,
"To her red, red flushing cheek.
"Ye've drapp'd, ye've drapp'd your broach of gowd,
"Thou Lord's daughter sae gay;
"The tears o'er-brimm'd her bonnie blue ee,
"O come, O come away.—

"O maid, undo the siller bar,
"To my chamber let me win,
"And tak this kiss, thou peasant youth,
"I daurna let thee in.
"And tak," quoth she, this kame o gowd,
"Wi' my lock o' yellow hair,
"For meikle my heart forbodes to me,
"I never maun meet thee mair.

FINIS.