The Melodist/The Auld Man's Mare's Dead

by Patie Pirnie

The auld Man’s Mare’s dead.
Written by Patie Pirnie, Fidler in Kinghorn.

The auld man’s mare's dead,
The poor man’s mare's dead,
Left meal, and peats, and a' to lead,
A mile aboon Dundee.

She was cut-lugget, paunch-lippet,
Steel-wame't, stamcher-fittet,
Chaunler-chafted, lang-necket,
Yet the brute did die.
The auld man's, &c.

Her lunzie banes were nags and neuks,
She had the cleeks, the cauld, the creuks,
The spavin, and the wanton yeuks,
And the howks aboon her een.
The auld man's, &c.

Her master rade her to the town,
He tied her till a staincher roun',
He took a chappin till himsel',
But the fient a drap gat she.
The auld man's, &c.