The Tired Soldier/Auld Lang Syne

by Robert Burns (1759-1796)

For other versions of this work, see Auld Lang Syne (Burns).

AULD LANG SYNE.

Should auld acquaintance be forgot
And never brought to mind?
Should auld acquaintance be forgot,
And auld lang syne?

For auld lang syne, my dear,
For auld lang syne,
We'll tak a cup o' kindness yet
For auld lang syne.

And surely ye'll be your pint-stoup,
And surely I'll be mine,
And we'll tak a cup o' kindness yet,
For auld lang syne.
For auld, &c.

We twa hae run about the braes,
And pou'd the gowans fine;
But we've wander'd mony a weary fitt,
Sin auld lang syne.
For auld, &c.

We twa hae paidl'd i' the burn,
Frae morning sun till dine;
But seas between us breid hae roar'd,
Sin auld lang syne.
For auld, &c.

And there's a hand my trusty frien',
And gie's a hand o' thine,
And we'll tak a right gude willie-waught,
For auld lang syne.
For auld, &c.