The Year That's Awa (1)/Blythe, Blythe, An' Merry Are We

by Anonymous

For other versions of this work, see Blythe, Blythe, An' Merry Are We.

BLYTHE, BLYTHE, AN' MERRY ARE WE

Blythe, Blythe, an' merry are we,
Blythe are we ane an' a';
Aften hae we cantie been,
But sic a night we never saw.

The gloamin' saw us a' sit down,
An' meikle mirth has been our fa';
But ca' the tither toast aroun',
Till chanticleer begin to craw.
Blythe, &c.

The auld kirk bell has chappit twal':
Wha cares tho' she had chappit twa!
We'er light o' heart, an' winna part,
Tho' time an' tide should rin awa'.
Blythe, &c.

Tut! never spier how wears the morn,
The moon's still blinkin' i' the sky!
An' gif like her we fill our horn,
I dinna doubt we'll drink it dry.
Blythe, &c.

Then fill we up a social cup,
And never mind the dapple dawn;
Just sit a while, the sun may smile,
An' light us a' across the lawn.
Blythe, &c.

 

---