The fables of Aesop by William Caxton (Jacobs)/Vol. II/Auian/Fable 27
¶ The xxvij fable is of the wulf and of the lambe
f two euyls men ought euer to
eschewe and flee the worst of
bothe / yf ony of them may be
eschewed / as hit appiereth by
this fable / of a wulf / whiche
ranne after a lambe / the whiche lambe fled
into the hows where as gotes were / And whan
the wulf sawe that he myght in no wyse take
the lambe / he sayd to hym by swete wordes /
Leue thy felauship / and come with me into the
feldes / for yf thow come not / thow shalt be
take by them / and shalt be sacryfyed to theyre
goddes / And the lamb ansuered to the wulf /
I haue leuer to shede al my blood for the loue
of the goddes / and to be sacryfysed[errata 1] / than to be
eten and deuoured of the / And therfore he is
ful of wysedome and of prudence / who of two
grete euyls may and can escape the grettest of
bothe /
¶ Here fynysshen the fables of Auian / And after followen the fables of Alfonce