The fables of Aesop by William Caxton (Jacobs)/Vol. II/Auian/Fable 7
¶ The vij fable is of the camel and of Jupiter
Uery creature ought to be content
of that / that god hath gyuen to
hym withoute to take their herytaunce
of other / As reherceth this
fable Of a camel whiche som
tyme complayned hym to Jupiter of that the
other beestes mocqued hym / by cause that he
was not of so grete beaute / as they were of /
wherfore to Jupiter Instantly he prayd in suche
maner as foloweth / Fayr syre and god / I requyre and
praye that thow wylt gyue to me hornes /
to thende that I maye be nomore mocqued /
Jupiter then beganne to lawhe / and in stede of
hornes / he took fro hym his erys / and sayd /
thow hast more good than hit behoueth thee to
haue / And by cause that thow demaundest that /
whiche thow oughtest not to haue I haue take
fro the that whiche of ryght and kynd thow
ouȝtest to haue / For none ought not to desyre
more than he ought to haue / to the ende that
he lese not that whiche he hath /