Three excellent and at present very fashionable songs/Birniebouzle
Tune—Braes of Tullymet.
Will ye gang wi' me, lassie,
To the braes o' Birniebouzle?
Baith the earth an’ sea lassie,
Will I rob to send ye:
I'll hunt the otter an’ the brock.
The hart, the hare, an’ heather-cock;
An' pu’ the limpat off the rock,
To fatten an’ to send ye.
If ye'll gae wi’ me lassie,
to the braes o’ Birnibouzle,
Till the day ye dee lassie,
ye sall aye hae plenty:
The peats I'll carry in a skall;
The cod an' ling w' lines I'll pull;
An' reave the eggs o' many a gull,
To make ye dishes dainty.
Sae cheery will ye be lassie,
I’ the braes o' Birniebouzle;
Donald Gun and me lassie,
ever will attend ye.
Though we hae nouther milk nor meal,
Nor lamb nor mutton, beaf nor veal,
We'll sank the porpy an' the seal,
And that's the way to send ye.
An' ye sal gang sae braw lassie,
at the kirk o' Birniebouzle;
Wi littit brogs and a, lassie,
wow but ye'll be vaunty:
An' ye sal wear, when you are wed,
The kirtle and the highland plaid,
An' sleep upon a feather bed,
Sae cozy and sae canty.
If ye will marry me laddie,
at the kirk o' Birniebouzle,
My chiefest aim shall be laddie
ever to content ye:
I'll bait the line and bear the pail,
An' row the boat and spread the sail,
An' dadd the clotters wi' a flail,
To make our tatoes plenty.
Then come awa wi' me lassie,
to the braes o' Birniebouzle;
An' since ye are sae free lassie
ye sall ne'er repent ye:
For ye sal hae baith tups and ewes,
An' gaits and swine, and stots and cows,
An' be the lady o' my house,
An' that may well content ye.