User:Rho9998/Augustine's Prayer
Cotton MS Tiberius A III
<50v>
Drihten þu eart scippend ealra gescefta for gẏf me ærest ꝥ ic þe cunne rihte ⁊ gescadwislice biddan ꝥ ic mæge geearnian ꝥ ic si þæs wẏrðe ꝥ þu me for þinre mildheortnesse alife ⁊ ge freolsige. Ic clẏpige to ðe drihten
<51r>
þu þe ealle geworhtest ꝥ elles ge weorðan ne mihte ne eac wunian ne mihte butan þe. Ic clẏpige to þe drihten þu þe nám gescea ne for lætst to nahte geweorðan. To þam ic clipige þe ealle gesceafte smicere ge worhte bútan ælcum andweorce. To þe ic clẏpige þe næfre nan ẏfelne worhtest. ac ælc gód wýrcst. Ic þe halsige þu arfæsta. ⁊ wæl willenda ⁊ wel wẏrcenda drihten ꝥ þu me under fó þinne flẏman. forþam ic wæs geo ðín. ⁊ þa fleah fram þe to deofle. ⁊ ful eode his willan ⁊ micel broc geþolade on his þeowdome. Ac gif þe nu þincð swá swá in þincð ge noh lange ic wæs on þam bismære ⁊ on þære scame þe hi me onge brohton. Ac onfoh me nu þine agenne þeowan forþam ic eom fleonde fram heom. Hwæt hi me under fengon ærþa ic sceoc fram þe to hiom nu ic þe ge foht hæbbe. Ac on tẏn me þine duru ⁊ tæc me hu ic sceole to þe cuman næbbe ic þe nauht tobringan ne buton godne willan for þam þe ic self naht elles nebbe ne ic naht betere nat þonne ic lufige ꝥ heofonlice ⁊ ꝥ gastlice ofer ꝥ eorðlice swa ic eac do god fæder for þam ic me naht betere nat þonne þæt. Ac ic nat hu ic sceol cuman to þe buton þu me lare. Ac ge tæc hit me ⁊ ge fultuma me. Gif þe þurh ge treowa findan þa þe findan forgef me þonne cræft. Gif þe þurh wisdom findan þa þe findan forgef me þære wisdom ⁊ ge ẏc hine on me. Eala hu þin godnes is to wundrianne. for þam hio is ungelic eallum oþrum gódum Ic wilnigende cuman to þe. ⁊ þæs ealles þe ic on þam wege habban þearf
<51v>
ic wilnige to þe. ⁊ þæs swiðost þe ic bútan to þe cuman ne mæg. Gif þu me forlætst þonne for wurþe ic. Ac ic wát þeah ꝥ þu me nelt for lætan. buton ic þe for læte. ne ic eac nelle for lǽtan þe. forþam þu eart ꝥ hẏhstae god. Nis nan þara þe þe rihte secð ꝥ he þe ne finde þa ána þe onriht secað þe þu onriht lærst ꝥ hi þe secan ⁊ him getæcst hu hi þe secan sculon wélla god fæder wel alẏs me of þam ge dwolan þe ic oð þis on dwelede ⁊ git dwelige. ⁊ getæc me þære weg þe me nan feond ongemete ær ic to þe cume. gif ic naht ofer þe ne lufige. Ic þe halsige ꝥ ic þe gemete ⁊ gif ic æniges þinges ungemetlice ⁊ unrihtlice wilnige gefreo me þæs. ⁊ gedo me þæs wẏrðne ꝥ ic þe mote gefeon. Ðu selesta fæder. ⁊ þu wisesta. ic þe befæste mine lichaman ꝥ þu hine gehæle hálne. Ic nat þeah hwes ic þær bidde þe nẏttes þ unnẏttes me sẏlfum ne ꝥ nat hu lange þu hine halne wilt gehealdan for þi ic hine befæste þe. ⁊ bebeode for þam þu bet wást þonne ic wite. hwæs ic beþearf forþam ic bidde ꝥ þu me simle lǽre þa hwile þe ic on þisú lichaman. ⁊ on þẏsse worulde. sẏ ⁊ gefultume ne ꝥ ic sẏmle þæne ræd arædige þe þe licwẏrðe sẏ. ⁊ me fremfull. ⁊ þearflic si for bám lifum. ⁊ betst ⁊ nẏtwẏrðost sẏ ⁊ nu git ofer ealle oþre þing ic ge þe geornlicost bidde ꝥ þu me eallunga to gecyrre. ⁊ ne læt me nan wuht ofer winnan on þissum wege ꝥ ic ne mage cuman to þe ⁊ ge clænsia me þa wile þe ic on þisse worolde si. ⁊ gedo me eadmodne. ⁊ sẏle me ofer hyda. Dó me gescadwisne. ⁊ rihtwisne. ⁊ for þancolne. ⁊ ful fremedne ⁊ gedo me lufigendne. ⁊ andgitfulne þines wisdomoes ⁊ gedo me wirðne ꝥ ic si wunigende on þinum eadigan rice si hit swá.