User:Rho9998/Grave

Source: [1]

Ðe wes bold gebyld, er þu iboren were.
Ðe wes molde imynt, er ðu of moder come.
Ac hit nes no idiht, ne þeo deopnes imeten;
Nes gyt iloced, hu long hit þe were.
Nu me þe bringæð, þer ðu beon scealt.
Ne me sceæl þe meten and þa molde scoðða.
Ne bið nu þin hus healice itinbred:
Hit bið unheh and lah, þonne þu list þerinne.
Ðe helewages beoð lage, sidwages unhege:
Þe rof bið ibyld þire broste ful neh.
Swa ðu scealt on molde wunien ful calde,
Dimme and deorcæ. Þet den fulæt on honde.
Dureleas is þet hus and dearc hit is wiðinnen.
Ðær þu bist feste bidytt and deað hefð þa cæge.
Ladlic is þet eorðhus and grim inne to wunien.
Ðer þu scealt wunien and wurmes þe todeleð.
Ðus ðu bist ilegd and ladæst þine fronden.
Nefst ðu nenne freond, þe þe wylle faren to,
Ðæt efre wule lokien, hu þe þet hus þe likie,
Ðæt æfre undon ðe wulc ða dure
. . . . . . . . . and þe æfter lihten.
For sone þu bist ladlic and lad to iseonne.
For sone bið þin hæfet faxes birened;
Al bið ðes faxes feirnes forsceden;
Næle hit mit fingres feire stracien.