User:Rho9998/The Vision of Leofric
Source: Cambridge, Corpus Christi College, Parker Library MS 367, ff. 101v-103v
<101v>
Ðeo englissce passionale· ⁊ ·ii· englissce dialogas· ⁊ oddan boc· ⁊ þe englisca martirlogiū ⁊ ·ii· englisce· salteras· ⁊ ·ii· pastorales· englisce· ⁊ þe englisca regol· ⁊ barontus·
hER GESUTELAÐ ÐA GESIHÐE ðE LEOFRIC EORL gesæh. him þuhte tosoðan onhealf slapendon lichaman na eal linga sƿẏlce onsƿefne ac gẏt geƿisslicor ꝥ he sceolde nede ofer ane swiðe smale brucge· ⁊ seo ƿæs swiþe lang ⁊ þær arn swiðe feorr beneoðan egeslic ƿæter sƿlyce hit ea ƿære· Ða þa he mid þā ge dræht ƿæs þa cƿæð him stefn to· Ne forhta þu· eaðe þu þa bricge ofer ferest· Mid þam þa ƿearð he sona ofere nẏste he hu· Ða þa he ofere ƿæs þa cō him lateoƿ ongean ⁊ hẏne lædde to anū sƿẏðe ƿlitigan felde· ⁊ sƿẏþe fægeran mid sƿetan stence afẏlled· Þa geseah he sƿẏþe mẏcele ƿeorud sƿẏlce on gang dagan· ⁊ þa ƿæron ealle mid snaƿ hƿitú reafe ge scrẏdde· ⁊ ꝥ on þa ƿisan þe se diacon bið þonne he god spell ret· ⁊ ƿæs an þæra onmiddan standende on mæsse preostes réafe sƿẏþe heah· ⁊ swẏðe mẏcel ofer eal þæt oþer folc· Ða cƿ̄ se lat teoƿ· ƿast þu hƿæt þis seo· Nese cƿæð he· hit is for paulus hæfeð nu ge mæs sod· ⁊ bletsað nu þis folc Ða lædde he Inne furðor ꝥ hi
<102r> coman þær þær sæton six arƿurðlice menn sƿiðe ƿurðlice gefræteƿod· Ða cƿæð heora an· hƿæt sceoll þæs fula mann on ure færræddene· þa ⁊sƿarode hī oþer· ⁊ cƿæð he mot beon mid us he is niƿan ge fullod þurh dæd bote· ⁊ he cẏmð to us onþære þriddan gebẏr tide Ða ƿæs eac his ge ƿuna ꝥ he ƿolde sƿẏþe lytel drincan þeah he mid ge beorū bliðe ƿære ⁊ þænne he ƿiste ꝥ menn fæste slæpen· he ƿolde on dihlūstoƿū hine georne gebiddan· Ða ƿæs he æt cristes cẏrican mid þā cẏninge· þa spræc he on æfen ƿið þone cẏrcƿard· ⁊ hine georne bæd ꝥ he hine innlete þænne he þa dura cnylde· ac he þæt forgẏmde for is drucennẏsse· Ða þa he to þære dura cō· ⁊ þær langsumlice sƿyðe cnucede· ⁊ georne cunnode hƿæðer he hi on ænige ƿisan undon mihte· ne mihte na· Ða he þæne cẏrƿard ge hẏrde ofer eall hrutan· þa ne ƿænde he him nanes in cẏmes· Ac feng þa on his gebedo sƿa his geƿuna ƿæs for þær ƿæs anfore hus ætæ þære cẏrcanduru· Ða on þa gebede ƿearð seo duru færincga ge openad· ⁊ he þa sona in eode· ⁊ hine to his drihtene ge bæd up ahafenum earmū· Ða ƿarð his leohtbora afẏrht· sƿẏðe· ⁊ ge feall him inanan heale· ⁊ mid þære forht næs se ꝥ hine ofer eode slǽp· Ða ge seah he fullge ƿisslice ꝥ he stod on middan þære flore aþenedū earmum mid mæsse
<102v> gescrẏdd· ⁊ hæfde grene mæsse hacelan· on him beorhte scinende· ⁊ he þæs sƿẏðe ƿundrode· Eft hit ge timode· ǽt oðrum sæle· þæt he ƿæs mid þam kẏnge· æt þære ẏlcan stoƿe· Ða dẏde he sƿa his geƿuna ƿæs· eode to cẏrcean· mid his þreom cnápan· þa þa oðre mén slepon· ⁊ he hine þa ge bǽd· eal sƿa his geƿuna ƿæs· þæt ƿæs sƿa neh scé dunstanes bẏrgenne· sƿa he nese mihte· Ða ƿurðen þa twegen cnápan sona onslæpe· ⁊ se þridda ƿacode þæt sƿiðor for ége þonne for his gebedum· Ða gehẏrde he færinga swẏðe unge rẏdelic gelẏd· þam ge licost þe he ǽrost sƿẏlce þa muneca setl færlice feollon· ealle to gedere· ⁊ ƿæs æfre sƿa lengre sƿa hluddre· ⁊ menig fealdre· ⁊ ungerẏddre Ða æfter langum fẏrste· gesƿac ꝥ ge hlẏd· Þær ƿæs innan þære cẏrcean· bẏrnende blacern· þa scean þær færing leoht inn æt þam east ende· sƿẏlce niƿe mona arise sƿa ꝥ hit lihte under þære rode sƿẏðran earme· þe stód ofer ꝥ ƿeofed· þa ƿæs hit sƿa leng sƿa leohtre· sƿa lange hit leohtode ꝥ þæs blacernes leoht næs nan þing gesẏne· ⁊ ꝥ sƿa ꝥ hit lihte geond ealle þa ƿíd gẏllan cẏrcan· Sƿa lange hit ƿæs þa on ðam þæt he hit ne dorste na lengc be haldan· ⁊ hit asanode· þa on þa ẏlcan ƿẏsan þe hit ǽr ƿæxende ƿæs· sƿa ð he geseh eft ꝥ blacern·
<103r> leoht· ⁊ þæt oðer gesƿac· ⁊ seoforædde cnapa· ꝥ eal mid him geseah ⁊ hẏrde· sƿẏlce hit togeƿitnesse ƿǽre· ⁊ þa oðre slepon· ⁊ þæs nan þing nẏston· Neh þon ẏlcan sǽle se cing leg æt sand ƿíc mid scipum· Ða ƿǽs his geƿúna þǽt he ƿolde ælce dæge habban tƿa mæssan· butan hit ma ƿǽre· ⁊ ealle his tida· togædere ǽr he út eóde· þa eóde he ꝥ hig ẏmbe sume neóde· þa mæssede man þam cẏnge ǽt scē clementes cẏrcean· Ða cƿæð he to his geferan ꝥ hit betere ƿære· ꝥ hig þa mæssan hǽfdon· ⁊ he þa inn eode· ⁊ him man sona hrẏmde· ⁊ he þa sona eóde binnan þonne ƿeoh stal· on norð healfe· ⁊ se cẏng stod on suð healfe· Ða ƿǽs þær án þrilig ƿahrægel· ⁊ sƿẏðe þicce geƿefen þæt hangode bæftan þam ƿeofode· ⁊ stod þær án medmẏcel ród· onðære eorðan onðam norð east hẏrnan· ⁊ ƿæs sƿa mẏcel þæs treoƿes gesẏne· sƿa ƿolde beon god hande brad beneoþan þam ƿah rifte· ⁊ se oðer dæl ƿæs betwẏx þam ƿah rifte ⁊ þam ƿahe· ⁊ se preost mæssode be cruce· Ða geseah he ofer þa rode ane hand sƿẏlce heo bletsode· þa ƿende he ærost þæt sum man hine bletsode for þam seo cẏrce ƿæs eall folces afẏlled· þa næs ꝥ na sƿa· Ða beheold
<103v> he hit þa gẏt geornor þa geseah he ealle þa rode sƿa sƿitole sƿẏlce þær nan þing beforan nære· ⁊ ƿæs seo bletsiende hand· stẏriende· ⁊ ƿendende upƿart· þa forhtode he· ⁊ tweonode him hƿeðer hit sƿa ƿære· sƿa him þuhte· Ða mid þæs modes tƿeonunge þa æteoƿde heo him sƿa sƿutole sƿa he his agenne geseon mihte· ⁊ ƿæron fægere fingras smale ⁊ lange· ⁊ þæra nægla to scead· ⁊ se greatalira be neoðan þam þuman eall ƿæs gesẏne· ⁊ fram þam littlan fingre toƿeard þæs earmes ⁊ sumne dæl of þære slẏfe· Ða nedorste he hit naleng be healdan· ac heng ꝥ heafod adun· ⁊ hit þa gesƿac þæra bletsunga ꝥ ƿæs neh þam þes godspel ƿæs gerædd· Feoƿertẏne nihton ær his forð siðe he fore sæde þonne dæg þe he scolde cuman to cofantreo to his langan hame þær he on restet· ⁊ hit aeode· eall sƿa he sæde· Requiescat inpace·