Burns' Popular Songs/My Nannie, O

by Robert Burns (1759-1796)

For other versions of this work, see My Nannie, O.

My Nannie, O.

Behind yon hills where Lugar flows,
'Mang moors and mosses many, O,
The wintry sun the day has clos'd,
And I'll awa to Nannie, O.

The westlin winds blaws loud and shill;
The night's baith mirk and rainy, O;
But I'll get my plaid, and out I'll steal,
And owre the hills to Nannie, O.

My Nannie's charming, sweet, and young:
Nae artfu' wiles to win ye, O:
May ill befa' the flattering tongue
That wad beguile my Nannie, O.

Her face is fair, her heart is true,
As spotless as she's bonnie, 0:
The op'ning gowan, wet wi' dew,
Nae purer is than Nannie, O

A country lad is my degree,
And few there be that ken me, O;
But what care I how few there be?
I'm welcome aye to Nannie, O.

My riches a's my penny-fee,
And I maun guide it cannie, O;
But warld's gear ne'er troubles me,
My thoughts are a' my Nannie, O.

Our auld guidman delights to view
His sheep and kye thrive bonnie, O
But I'm as blythe that hauds his pleugh,
And has nae care but Nannie, O.

Come well, come woe, I care nae by.
I'll tak what Heav'n will sen'me, O;
Nae ither care in life have I,
But live, and love my Nannie, O.

---