Evangelium Secundum Mattheum: the Gospel of Saint Matthew in West-Saxon/Chapter 28

CAPUT XXVIII

Đys [godspel] sceal on ēasterǣfen.

1. Sōðlīce þām restedæges ǣfene, sē þe onlīhte on þām forman restedæge, cōm sēo Magdalenisce Maria and sēo ōðer Maria þæt hig woldon gesēon þā byrgene.^[1]

2. And þǣr wearð geworden micel eorþbifung; witodlīce Drihtenes engel āstāh of heofenan, and genēalǣhte and āwylte þone stān, and sæt þǣr onuppan.^[2]

3. Hys ansȳn wæs swylce līgyt, and hys rēaf swā hwīte swā snāw.^[3]

4. Witodlīce þā weardas wǣron āfyrhte, and wǣron gewordene swylce hig dēade wǣron.

5. Đā andswarode sē engel and sǣde þām wīfon, Ne ondrǣde gē ēow; ic wāt witodlīce þæt gē sēceað þone Hǣlynd þone þe on rōde āhangen wæs.^[4]

6. Nys hē hēr; hē ārās sōðlīce, swā swā hē sǣde. Cumað, and gesēoþ þā stōwe þe sē Hǣlynd wæs on ālēd.^[5]

7. And farað hrædlīce, and secgeað^[6] hys leorningcnihtum þæt hē ārās; and sōðlīce hē cymð beforan ēow on Galileam; þǣr gē hyne gesēoþ: nū ic secge ēow.^[7]

Đys [godspel] sceal on frīgedæg on ðǣre ōðre ēasterwucan.

8. Đā fērdon hig hrædlīce fram þǣre byrgene mid ege and mid myclum gefēan, and urnon and cȳðdon hyt hys leorningcnihton.^[8]

9. And efne þā cōm sē Hǣlynd ongēan hig, and cwæð, Hāle wese gē. Hig genēalǣhton, and genāmon hys fēt and tō him geēaðmēddon.^[9]

10. Đā cwæð sē Hǣlynd tō heom, Ne ondrǣde gē ēow; farað, and cȳþað mīnum gebrōþrum þæt hig faron on Galileam, þǣr hig gesēoþ mē.^[10]

11. Þā þā hig fērdon, þā cōmon sume þā weardas on þā ceastre, and cȳðdon þǣra sācerda ealdrum ealle þā ðing þe ðǣr gewordene wǣron.^[11]

12. Đā gesamnudon þā ealdras hig, and worhtun gemōt, and sealdon þām ðegenum micyl feoh, and cwǣdon,^[12]

13. Secgeað þæt hys leorningcnihtas cōmon nihtes, and forstǣlan hyne ðā wē slēpun.^[13]

14. And gyf sē dēma þiss geāxað, wē lǣrað hyne, and gedōð ēow sorhlēase.^[14]

15. Đā onfēngon hig þæs fēos, and dydon eall swā hig gelǣrede wǣron; and þis word wæs gewīdmǣrsod mid Iudeum oð þisne andweardan dæg.^[15]

Đis [godspel] sceal on frīgedæg innan þǣre ēasterwucan.

16. Đā fērdon þā endlufun leorningcnihtas on þone munt þǣr sē Hǣlynd heom dihte,^[16]

17. and hyne þǣr gesāwun, and hig tō him geēaðmēddun; witodlīce sume hig twēonedon.^[17]

18. Đā genēalǣhte sē Hǣlynd, and spræc tō heom þās þing and þuss cwæð, Mē is geseald ǣlc anweald on heofonan and on eorðan.^[18]

19. Farað witodlīce and lǣrað ealle þēoda, and fulligeað hig on naman Fæder, and Suna, and þæs Hālgan Gāstes;^[19]

20. and lǣrað þæt hig healdon ealle þā ðing þe ic ēow bebēad. And ic bēo mid ēow ealle dagas oð worulde geendunge. †Amen.^[20][21]

1. A, byrgenne.
2. A, þar; A, dryhtnes, B, drihtnes; A, heofenum, B, heofonan; A, awylede þone stan on weg; A, þar.
3. A, lyget.
4. A, andswarede; A, wifum; A, secað; A, hælend.
5. A, hælend.
6. A, secgað, B, sæcgeað.
7. A, þar.
8. A, hig fram þære byrigenne hrædlice (changed order); A, mycelum; A, -cnyhtum.
9. A, hælend; Corp., we sege (for wese ge); A, geeadmeddon.
10. A, hælend; A, hym, B, him; B, minun; A, broðrum, B, gebroþrun; A, faran.
11. B, comun; B, cestre; B, cyþdun; B, ealdrun; A, ðar; Corp., wærum, A, wæron, B, wærun.
12. A, gesamnodon, B, gesamnudun; A, worhton; B, sealdun; A, þegnum, B, þegenun; A, mycel, B, micel; B, cwædun.
13. A, secgað; B, comun nihtys; A, forstælon; A, slepon.
14. A, þys, B, þis; A, geacsað.
15. B, onfengun; B, dydun; B, wærun; Corp., wurd, A, B, word; B, gewidmærsud; B, andwerdan.
16. B, ferdun; A, endleofen; A, þar; A, hælend; A, hym, B, him.
17. A, gesawon; A, geeaðmeddon; B, Witudlice.
18. A, hælend; A, hym, B, him; A, B, þus; A, heofenan.
19. B, witudlice; A, fulliað.
20. B, healdun; A, bead; A, weorlde. Corp., Finit Amen, A, B, amen.
21. After Finit Amen Corp. has Sit sic hoc hic Interim. Ego ælfricus scripsi hunc librum in monasterio baðþonio & dedi brihtwoldo preposito. Qui scripsit uiuat in pace. in hoc mundo & in futuro scło. & qui legit legator in eternum.