New Song, to the Tune of Cauld Kail in Aberdeen/Come, My Love

COME, MY LOVE.

Come alang wi' me my love,
O come alang wi' me:
The low'ring clouds are vanish'd love,
And the moon blinks bonnilie.
I maunna gang wi' thee my love,
I maunna gang wi' thee,
For soon the cluds may gather love,
And hide the moon's bright ee.

O come alang wi' me my love,
O come and dinna fear;
The sky is cloudless blue my love,
And the starns are shinin' clear,
I maunna gang wi' thee my love,
For I hae much to fear;
The meteor's frequent gleam my love,
Portends a tempest near.

O come alang wi' me my love,
And dinna say me nay;
Come see the sportive spunkie love,
A happin down the brae.
I maunna gayg wi' thee my love,
I e'en maun say thee nay;
The spunkie's treacherous flame my love,
Leads followers far astray.

O come alang wi' me my love,
O come alang wi' me.
And see the hoary cranreuch love,
Bedeck the leafless tree.
I maunna gang wi' thee my love,
I maunna gang wi' thee:
The frost that decks the tree my love,
Cauld wad it fa' on me.

O come alang wi' me my love,
Come to the burnie's side:
The cauld blast winna steer thee love,
I'll hap thee in my plaid.
I maunna gang wi' thee my love,
To the burnie's rocky side:
I coudna see thee cauld my love,
And me row't in thy plaid.

O come alang wi' me my love,
O come and fear nae harm; twa,
We'll share the plaid atween us
And keep ilk ither warm.
I come—and thus it ay will be,
Let fortune smile or storm,
We'll share the plaid atween us twa,
And keep ilk ither warm.

 

FINIS.