New garland of choice songs/Johnny Coup

JOHNNY COUP.

COUP sent a letter frae Dunbar,
Charlie meet me an ye dare,
And I'll learn you the art o‘ war,
if you'll meet wi me in the morning.

Hey Johnny Coup are ye waking yet,
Or are your drums a-beating yet,
If ye were waking I would wait,
To gang to the coals in the morning.

When Charlie look'd the letter upon,
He drew his sword the scabbard from,
Come follow me my merry merry men,
And we‘ll meet Johnny Coup i' the morning.
Hey Johnny Coup, &c.

Now Johnny be as good as your word,
Come let us try baith fire and sword,
And dinna rin awa like a frighted bird.
That s chac‘d frae its nest i‘ the morning.
Hey Johnny Coup, &c.

When Johnny Coup did hear of this,
He thought it wadna be amiss
To hae a horse in readiness
To flee awa i‘ the morning.
Hey Johnny Coup, &c.

Fy now, Johnny get up and rin,
The Highland bagpipes makes a din,
It s best to sleep in a hale skin,
For ‘twill be a bluidy morning.
Hey Johnny Coup, &c.

When Johnny Coup to Dunbar came,
They spier d at him where's a‘ your men?
O wow, says Johnny I dinna ken,
For I left them a‘ i‘ the morning.
Hey Johnny Coup, &c.

Now, Johnny, troth ye was nae blate,
To come wi' the news o‘ your ain defeat,
And leave your men in sic a strait,
So early in the morning.
Hey Johnny Coup, &c.

Alas! quoth Johnny, I got a flag,
Wi‘ their claymores and philabegs,
If I face them again I'll break my legs;
So I wish you a' good morning.

Hey Johnny Coup are ye waking yet.
Or are your drums a-beating yet;
If ye were waking I would wait,
To gang to the coals i‘ the morning.