O will I come/O will I come
O WlLL l COME.
Tune—The Lee Rig.
O will I come, when yont the nowes
The setting sun has hid his ee,
And meet thee whare the Irwin rows,
Sae smoothly through the gowan'd lea!
O will I come, and welcome be!
And wilt thou on my bosom rest;
And, while I own nae joy but thee,
Tell me I'm dearest to thy breast.
O yes, I'll come and joyfu' meet,
And hear thee say thou'rt a' my ain;
Our meeting moments shall be sweet—
But O how shall we part again!
Yon star that glimmers, o'er the main,
Shall set beyond blue Arran's brow,
And, blythe, the lark renew her strain,
Ere I, reluctant, sigh—adieu.
[SUNG SLOW]
But if I come, and thou, unkind,
Should'st shaw nae welcome in thy ee,
Then night—in a' thy sables bend
In awfu' darkness o'er the lea;
And let nae starnie, glintin' hi'.
Abate the horror o' thy reign,
But sunk in drearie woe, like me,
Let Nature wrapt in gloom remain.
Perhaps some youth, than me more dear,
Has smooth'd his way by tender art;
Has sigh'd his passion in thy ear,
And found submission to thy heart.
Then a' ye dreams o' joy depart,
For oh, this throbbing heart is sair!
Nae future hour will joy impart—
Nae future scene will ease my care.
[LIVELY]
But na—she smiles! Maria smiles
As blythe as morning's risin' ray—
Nae happier youth, wi artfu' wiles,
Has lur'd her maiden heart away.
Then joy resume thy welcome sway,
And ever reign within my breast—
Let fortune send me weel or wae,
I tent na—since wi' Mary blest.