nous voet jugger, pour mes deveroyt de son soyl le tres' en gitier et pris do lautri buchete oster. Cestes choses dioms pour notre fitz si bon seyt aprendre, et si autre si a reprendre, qar coment que nous seyoms en age plus tendre, nous savoms sil covent de tuz nos fatez raison rendre. Et voillez, Sire, entendre que nous avoms si lougement a les escoles de clers et de prelatz apres notre lescon rendre, que nous ne devoms de celes scienceis en autre escole licenses prendre. Par que vos, Sire, nous devez pardonner si prelat ne voyse a lescole de chivaler, qar Seint Poul dit qe "spiritualis omnia judicat et a nemine judicatur."[1] Le sen dit seint espirit garde votre saver et votre aver. Escript a notre manoir de Chuddelegh le vendrodi apres le conversioun de Seint Poul, lan de notre sacre secounde. [January 1329.]
V. Letter of the Bishop to the Lady de Courtenay, the Countess of Devon, relating what had passed between the Earl and himself, and complaining of the disrespectful language of the Earl.
Grandisson's. Vol. L Reg. fol. 64.
Saluz come a notre quor de memo ove la beniseun de Dieu et la nostre. Sachez, treschere chosine, que nou priames lautre jour notre cher fiz votre seigneur pour asaier sa bone volunte vers nous de une priere quale nous qydoms que vous bien savez. Et il nous respondy en sey excusant. Ore quant a cele besoyne de quele excusacionx nous fumes et sumes bien paye, mes pourceo que il nous escripe autres resouns solon sa segnu rele volunte, nous ly respondoms derechef, qar il nous poyse molt que coment que il seyt sage, il se tent meymes trop sage et autres trop fous, quele chose nest pas signe de sauer, qar len dyt en Fraunce que nul nest fol que ne q̃de estre sage. Et nous esperons, cher chosine, par la grace de Dieu et leyde sa bone Mere, que nous ne fumes mye si a reprendre ne aprendre come il nous fet entendre. Et coment que nous poy savoms et valoms, nous sumes ne pourquant prestre et evesqz. et soun per en Dieu en vie et mort. Mes ne pourquant sachez de voirs que nous ne sumes pourceo ren mal paye ne mien de quoer, quar nous entendoms que il le fit pour bien, coment que nul ne droyt deleger crere ne dire mal de evesqz pour le peril que ent vient al alme contre Dieu qui ministre il est, qar nul ne doyt fere autre pecche le scon. Chere cosine le seynt esprit vous garde.
- ↑ Cur. ii. 15.
