WILL.
En le noun du piere et du fuiz et du seint esperit Jeo Humfrai de Bohun Counte de Hereford et Dessex en bone memoire et en sanctie facz mon testament en la manere qe sensuit. Primes je devis malme a nostre seigneur Jhesu crist qe soffri mort en la croiz pur moi et pur touz pecheours et ala benuree virgine Marie sa benoite mere et a touz les seinz de Parays et moun corps a sevelir en leglise nostre tres douce dame de Waledene pres du corps Elizabethe jadys ma cumpaigne. Ensement je devis qe touz mes dettes soient pleinement paiez et acquitez. et ce qe defaut du testament ma femme je voil qil soit perfourmy en toutes choses. Ensement je devys pur le cariage de mon corps du lieu la ou je sui mort tauntqe al Abbeye de Waledene et pur aumosnes faire et pur mon enterrement et pur la departie faire a mon enterrement et pur toutes autres choses qe a ce apendent. mille mars. en chargaunt mes Executours qe les corps de mon piere de ma mere et de ma cumpaigne soient auxi honestement covertz come mon corps et qe entre touz noz corps ne soit qe une herce de une course de luminaire. Ensement je devis a mon seignur le Roi un pot et une coupe dor. les queux ma femme me devisa. Item a Mons. Berthelme de Badlesmere le noir destrer qe je menai de ultremer. Et pur qe mon seignur le Roi la son merci me ad graunte par ses lettres patentes la moitie des issues de toutes mes terres du jour qe dieus avera fait sa volentie de moi tauntqe au plein eage de mon hoir et touz les deners qe purrent estre levez del mariage mon dit hoir et de touz les deners qe mon dit seignur le Roi me doit par acounte fait en sa gardrobe de ma demoere ovesqes lui. et auxint de touz les deners qe le counte de Haynaud de Hollande et de Zelaunde me doit[1]. Jeo devis
a Humfrai Edward William et Eneas mes fuiz cest asavoir a chascun de eux. ij. mille livres. pur achater terres ou mariages. ou pur emplyer en autres choses solonc ce qe noz Executours verront qe plus soit a lour proffet. et si les deners avauntditz amountent a plus nous voloms qil soient owelement parti entre noz quatre fuitz susditz. Ensement je devis a Alianore ma fille pur son aparail entre son mariage. cc. livres. Item je devis a Mons. Hughe de Courtenay Mle. mars. les queux je lui doi pur le mariage de Margarete ma fille. et de son fuiz et hoir. Item je devis a meismes cele Margarete pur laparail entre son mariage. cc. mars. Ensement je devis a mon enizne fuiz toutz mes armures et un lit entier de vert poudre de Cynes blaunches ove toutes les apurtenaunces. Item je devis a Mestre Johan Walewayn une coupe emprenté et enbocé de flurs de lis le quel fut a seint Edmon de Pounteny. et une petite coupe qe Giles de Herteberghe me dona a Bruges. et un anel dor ove un ruby qe ma femme me devisa qe ad tout pleni de coups et est en un petit forcer en une graunt husche au bout de la basse gardrobe. Ensement je de is a Monsire Robert de Haustede le piere et a dame Margerie sa femme pur la garde de Eneas mon fuiz. C. li. Et a monsire Robert de Walkefare. lx. livres. et a Monsire Wautier de Shorne- ↑ The arrears of the dower of his wife Elizabeth Plantagenet, as countess of Holland. See Fœdera, vol. ii. pt. 1, p. 271.
