shyppe north-warde, where as they sawe an ylonde full derke and full of stenche and smoke ; and there they herde grete blowynge and blastyng of belowes, but they myght se no thynge, but herde grete thondrynge, wherof they were sore aferde and blyssed them ofte. And soone after there came one stertynge out all brennynge in fyre, and stared full gastly on them with grete staryng even, of whome the monkes were agast, and at his depart- yng from them he made the horryblest crye that myght be herde. And soone there came a grete nombre of fendes and assayled them with hokes and brennynge yren malles, whiche ranne on the water, folowyng fast theyr shyppe, in suche wyse that it semed all the see to be on a fyre ; but by the wyll of God they had no power to hurte ne to greve them, ne theyr shyppe. Wherfore the fendes began to rore and crye, and threwe theyr hokes and malles at them. And they than were sore aferde, and prayed to God for comforte and helpe ; for they sawe the fendes all about the shyppe, and them semed that all the ylonde and the see to be on a fyre. And with a sorowfull crye all the fendes depart- ed fro them and returned to the place that they came fro. And than saynt Brandon tolde to them that this was a parte of hell, and therfore he charged them to be stedfast in the fayth, for they shold yet se many a dredefull place or they came home agayne. And than came the south wynde and drove them ferther into the north. where they sawe an hyll all on fyre, and a foule smoke and stenche comyng from thens, and the fyre stode on eche syde of the hyll lyke a wall all bren- nynge. And than one of his monkes began to crye and wepe ful sore, and sayd that his ende was comen, and that he might abyde no lenger in the shyppe, and anone he lepte out of the shyppe into the see, and than he cryed and rored full pyteously, curs- ynge the tyme that he was borne, and also fader and moder that bygate him, bycause they sawe no better to his cor- reccyon in his yonge age, " for now I must go to perpetual payne." And than the sayenge of saynt Brandon was veryfyed that he sayd to hym whan he entred into the shyppe. Therfore it is good a man to do penaunce and for- sake synne, for the houre of deth is incertayne.
And than anone the wynde turned into the north, and drove the shyppe into the south, whiche sayled vij. dayes contynually ; and they came to a grete rocke standynge in the see, and theron sate a naked man in full grete mysery and payne ; for the wawes of the see had so beten his body that all the flesshe was gone of, and nothynge lefte but synewes and bare bones. And whan the wawes were gone, there was a canvas that henge over his heed whiche bette his body full sore with the blowynge of the wynde ; and also there were two oxe tongues and a grete stone that he sate on, whiche dyd hym full grete ease. And than saynt Bran- don charged hym to tell hym what he
