Page:Gospel of Saint John in West-Saxon.djvu/122

CAPUT XIV

1. And hē cwæð tō his leomingcnihton,^[1]

Ðys godspel gebyrað tō ðǣre mæssan Phylippi and Iacobi.

Ne sȳ ēower heorte gedrēfed; gē gelȳfað on God, and gelȳfað on mē.

2. On mīnes Fæder hūse synt manega eardungstōwa; ne sǣde ic ēow. Hit ys lȳtles wana þæt ic fare and wylle ēow eardungstōwe gearwian?^[2]

3. And gif ic fare and ēow eardungstōwe gegearwige, eft ic cume and nime ēow tō mē sylfon; þæt gē sȳn þǣr ic eom.^[3]

4. And gē witon hwyder ic fare, and gē cunnon þone weg.^[4]

5. Thomas cwæð tō him, Drihten, wē nyton hwyder þū færst; and hū mage wē þone weg cunnan?^[5]

6. Sē Hǣlend cwæð tō him, Ic eom weg, and sōðfæstnys, and līf; ne cymð nān tō Fæder butan þurh mē.^[6]

7. Gif gē cūðon mē, witodlīce gē cūðon mīnne Fæder; and heonon forð gē hyne gecnāwað, and gē hine gesāwon.

1. A, -cnyhtum.
2. A, synd; A, gegearwian.
3. A, sylfum; A, þar.
4. Corp., B, C, þæne, A, þone (twice).
5. A, magon.
6. A, B, C, buton.