Page:Gospel of Saint John in West-Saxon.djvu/144

7. Þā Iudeas him andswaredon and cwǣdon, Wē habbað ǣ, and be ūre ǣ hē sceal sweltan, for þām þe hē cwæð þæt hē wǣre Godes Sunu.

8. Þā Pilatus gehȳrde þās sprǣce, þā ondrēd hē him þæs þē swīðor;

9. and ēode eft intō þām dōmerne, and cwæð tō ðām Hǣlende, Hwanon eart ðū? Witodlīce sē Hǣlend him ne sealde nāne andsware.^[1]

10. Þā cwæð Pilatus tō him, Hwī ne sprycst ðū wiþ mē? Nāst þū þæt ic hæbbe mihte þē tō hōnne, and ic hæbbe mihte þē tō forlǣtenne?^[2]

11. Sē Hǣlend him andswarode, Næfdest þū nāne mihte ongēan mē, būton hyt wǣre þē ufan geseald; for þām sē hæfð māran synne sē ðe mē þē sealde.^[3]

12. And syðan sōhte Pilatus hū hē hyne forlēte. Đā Iudeas clypodon and cwǣdon, Gif þū hine forlǣtst, ne eart ðū þæs Cāseres frēond; ǣlc þǣra þe hyne tō cynge dēð ys þæs Cāseres wiðersaca.^[4]

13. Đā Pilatus þās sprǣce gehȳrde, þā lǣdde hē ūt þone Hǣlend, and sæt ætforan þām dōmsetle on ðǣre stōwe þe is genemned Lithostrōtus, and on Ebrēisc, Gabbatha.^[5]

1. A, hwanen.
2. B, palatus; Corp., forlætene, A, B, forlætenne, C, forlætende.
3. Corp. Næfst, A, B, C, Næfdest; B, C, ongen.
4. A, cleopodon; A, forlætst; B, C, kaseres (twice); A, cyninge.
5. Corp., B, C, lithostratos, A, lythostratos; A, gabatha.