14. Hit wæs þā ēastra gegearcungdæg; and hyt wæs sēo syxte tīd. Đā cwæð hē tō ðām Iudeon, Hēr ys ēower Cyning![1]
15. Hī clypodon ealle and cwǣdon, Nim hyne, nim hyne, and hōh. Đā cwæð Pilatus, Sceal ic hōn ēowerne Cyning? Him andswaredon þā bisceopas and cwǣdon, Næbbe wē nānne cyning būton Kāsere.[2]
16. Đā sealde hē hyne hym tō āhōnne. Đā nāmon hȳ þone Hǣlend, and tugon hine ūt;[3]
17. and [hē] bær his rōde mid him on þā stōwe þe ys genemned hēafodpannan stōw, and on Ebrēisc Golgotha;[4]
18. þǣr hī hyne ahēngon, and twēgen ōðre mid him on twā healfa, and þone Hǣlend on middan.[5]
19. Witodlīce Pilatus wrāt ofergewrit, and sette ofer his rōde; þǣr wæs on gewriten, Þis ys sē Nazareniscea Hǣlend, Iudea Cyning.[6]
20. Manega ðǣra Iudea rǣddon þis gewrit; for þām þe sēo stōw was gehende þǣre ceastre þǣr sē Hǣlend wæs āhangen. Hit was āwriten Ebrēisceon stafon, and Grēcisceon, and Lēdenstafon.[7]
- ↑ A, eastron and geearcungdæg; A, iudeum; B, C, eowor.
- ↑ A, clypedon; A, nænne; A, casere.
- ↑ B, C, ðæne hælynd.
- ↑ Corp., A, B, C, bæron (A has he silf inserted before bæron, above the line, and bæron altered by erasure to bær).
- ↑ A, oðre men myd hym; Corp., B, C, þæne, A, þone.
- ↑ A, þar; A, nazarenisca.
- ↑ Corp., B, þiss, C, þis, A, þys; Corp., B, C, þeo, A, seo; A, ebreiscum stafum and creciscum and leden stafum.
