Page:Gospel of Saint John in West-Saxon.djvu/48

24. And þā þe þær āsende wǣron, þā wǣron of sundorhālgon.^[1]

25. And hig āxsodon hine and cwǣdon tō him, Hwī fullast þū, gif þū ne eart [Crīst], nē Elias, nē wītega?^[2]

26. Iohannes him andswarode, Ic fullige on wætere; tōmiddes ēow stōd þe gē ne cunnon.^[3]

27. Hē is þe æfter mē tōweard is, sē wæs geworden beforan mē; ne eom ic wyrðe þæt ic unbinde his scēoþwang.^[4]

28. Đās ðing wǣron gewordene on Bethania begeondan Iordanen þǣr Iohannes fullode.^[5]

Đys [godspel] gebyrað on þone .vii. dæg Godes ætȳwednysse.

29. Ōþre dæg Iohannes geseah þone Hǣlend tō him cumende, and cwæð, Hēr is Godes lamb; hēr is sē þe dēð aweg middaneardes synne.^[6]

30. Þēs is be þām ic sēde, Æfter mē cymð wer þe mē beforan geworden wæs, for ðām þe hē wæs ǣr ðonne ic.^[7]

31. And ic hyne nyste; ac ic cōm and fullode on wætere tō ðǣm þæt hē wǣre geswutelud on Israhela folce.^[8]

1. A, þar; sunderhalgon.
2. A, acsedon, B, C, axodon; Corp. art, A, B, C, eart; Corp., B, C, omit Crist, A, cryst; Corp., heligas, A, elias, B, C, helias.
3. A, fullie.
4. B, C, towerd.
5. A, be iordanen (-geondan omitted by haplography); A, þar.
6. Corp., synnæ, A, synna, B, synne (C, defective).
7. A, beforan me.
8. A, B, C, þam; A, geswutelod.