Page:Gospel of Saint John in West-Saxon.djvu/60

5. Witodlīce hē cōm on Samarian ceastre, þe is genemned Sichar, nēah þām tūne þe Iacob sealde Iosepe his suna;^[1]

6. þǣr wæs Iacobes wyl.^[2]

Ðys [godspel] sceal on frīgedæg, on þǣre iii. lengtenwucan.

Sē Hǣlend sæt æt ðām wylle, þā hē wæs wērig gegān; and hit wæs middæg.

7. Þā cōm þǣr ān wif of Samaria, wolde wæter feccan; ðā cwæð sē Hǣlend tō hyre, Syle mē drincan.^[3]

8. His leorningcnihtas fērdon þā tō þǣre ceastre, woldon him mete bicgan.^[4]

9. Þā cwæð þæt Samaritanisce wīf tō him, Hūmeta bitst þū æt mē drincan, þonne ðū eart Iudeisc, and ic eom Samaritanisc wīf? ne brūcað Iudeas and Samaritanisce metes ætgædere.

10. Đā andswarode sē Hǣlend and cwæð tō hyre, Gif þū wistest Godes gyfe, and hwæt sē is þe cwið tō þē, Syle me drincan, witodlīce þū bǣde hine þæt hē sealde þē līfes wæter.

II. Đā cwæð þæt wīf tō him, Lēof, ne ðū næfst nān þing mid tō hladanne, and þēs pyt is dēop; hwanon hæfst þū līfes wæter?^[5]

1. Corp., B, C, cestre, A, ceastre.
2. A, þar; A, wyll.
3. A, þar.
4. C, woldan.
5. Corp., hladene, A, hladenne; B, C, hladene; A, pytt; C, hæft (for hæfst).