32. Sē Hǣlend cwæð tō him, Sōð ic secge ēow, Ne sealde Moyses ēow hlāf of heofonum; ac mīn Fæder ēow sylþ soðne hlāf of heofonum.[1]
33. Hit is Godes hlāf þe of heofone cōm, and sylþ middanearde līf.[2]
34. Hig cwǣdon tō him, Drihten, syle ūs þysne hlāf.
35. Sē Hǣlend cwæð tō him, Ic eom līfes hlāf; ne hingrað þone þe tō mē cymð, and ne þyrst þone nǣfre ðe on mē gelyfð.
36. Ac ic ēow sǣde þæt gē gesāwon mē, and ne gelȳfdon.
37. Eall þæt Fæder mē sylþ cymð tō mē; and ic ne wyrpe ūt ðone þe to mē cymð.[3]
38. For þām þe ic ne cōm of heofonum þæt ic mīnne willan dō, ac þæs willan þe mē sende.[4]
39. Ðæt is þæs Fæder willa ðe mē sende, þæt ic nān þing ne forlēose of ðām þe hē mē sealde, ac āwecce þæt on þām ȳtemestan dæge.
40. Ðis is mīnes Fæder willa þe mē sende, þæt ǣlc þe ðone Sunu gesyhþ and on hine gelȳfð hæbbe ēce līf; and ic hine awecce on þām ȳtemestan dæge.[5]
41. Đā murcnodon þā Iudeas be him for þām þe hē cwæð, Ic eom hlāf þe of heofonum cōm.[6]
