Page:Humorous desription of the Battle of T**********k.pdf/5

5

And then there naething could be seen,
But broken crowns and blacken’d een,
Wi’ this the town was a’ alarm’d,
How a’ the youngsters were sae arm’d,
And how they a’ had left their wark,
And killing ither in the dark:
Then sic a sight ye ne’er did see,
Wi’ young and auld o’ each degree;
The lassies they fu’ plump and young,
Ran out to save their lovers bums,
Likewise each tender-hearted wife
Ran out to save their bairns’ life;
And mony a horrid mournfu’ scream
Was gi’en by mither, lass, and wean.
But by this time some were confounded,
And some o’ them were deeply wounded,
And some lay senseless on the plain,
And some o’ them were helped hame;
Some were for peace wi’ a’ their metal,
And some they up the coal did kittle.
 But O, alas! I’m truly sorry,
To think on Robin’s sweetheart Jenny;
As Rab and her were gaun fu’ douce,
Counting what things wad serve the house,
And wha they wad hae at their wadding,
And how they should na see the bedding,
And what new things they baith were needing,
And how sic and sic lass was breeding;
And what they wad ca’ their first bairn,
And how they’d lie in ither’s arms;