behyddan buten Nichodemus, ane, for-þan-þe he wæs an ealdor of þan Iudeisce folca. Þa com he to heom, þær þær heo heora samnunge hæfdon and cwaæð to heom: "Hwy comen ge hider on þysser gesamnunge, þæt ic hit ærre nyste?" Þa andsweredan þa Iudees and cwædan: "Ac hwu wære þu swa dyrstig, þæt þu dorstes innen ure gesamnunga gan, þu þe wære werigend and midspecend þan Hælende? Ac seo he æfre mid þe here and ec on þære toweardan wurlde." Nichodemus cwæð: "Amen! Amen!"
Eallswa gelice Ioseph æfter hine æteowde and heom to com and þuss cwæð; "For hwy synden ge swa unrote ongean me? Is hit for-þan-þe ic abæd pæs Hælendes lichame æt Pilaten? Soð hit is þæt ic hine abæd and on clænen syndonissce hræigle befeold and hine on minen þruge geleigde and ætforen þan scræfe mycelne stan ahwylfde. And ic secge to soðen þæt [Fol. 88b] ge nan" þing wel ne dyden ongean þone rihtwisen, þæt ge hine on rode anhengan and mid spere sticoden."
Þa þa Iudees þæt geherdan, þa gefengan heo hine and heten hine on cwarterne fæste beclysen and cweðen to him: "Oncnaw nu and ongit þæt hit þe sceal lytel fremigen, þæt þu toþohtest. We wyten þæt þu ne eart næfre wyrðe þæt þu bebyried beo; ac we sculen syllen þin flæsc heofone fugelan and wilde deoran." Þa Iudees hine þa on cwarterne gebrohten and þa dure fæste belucan; and Annas and Caiphas þa locan fæste geinsegelodan and þærto herdes gesetten and geðoht worhten wið þan ferrædden on hwylcen deaðe heo hine syllen mihten and ofslean. Ac heo nolden for þan restendæige. And heo þa beðohten hwu heo wyrest mihten hine æteon.
Đa gesamnoden heo on þan þridden dæige, Annas and Caiphas and ealla heora lyðre geferen, and comen to þan cwarterne and þa locan
