þas þeostre gelihte. And eac gelice ealla þas ealdres þysere helle synden swyðe afyrhte.'
"Þa wæron þa deofle ealle clypigende anre stefne and cwæðen: Hwanen eart þu, la Hælend, swa strang mann and swa [Fol. 98a] briht on mæigne, and wunigende buten ælcen lehtre and clæne fram ælcen wæmme? Eall middeneard us wæs simle underðeodd forð þæt nu. Eornestlice we axigeð hwæt þu seo, þu þe swa unforht us eart gecumen and wylt us benymen eall þæt we hider habbeð gestrynd, [and] fif þusend and fif hundred wintre on pine and on synbænde gebroht hæfden? Hweðer hit wen seo, þæt þu seo se ilca Hælend þe Sathanas embe spæc, ure ealder, and sægde þæt he wolde þurh þine deað anweald habben ealles middeneardes?'
"Ac se wulderfæste Cyng and ure heofonlice Hlaford nolde þære deoflena gemaðeles na mare hlysten, for-þan heo wolden mid heora maðele hine dreccen. And Beelzebub fleah þa into helle botme, and ure Drihten him strangode æfter and hine befran hwy he swa swyðe nyðer his setle gecure, and ærre cwæð þæt eall wurld wæs his. And he hine gegrap þa and fæste geband mid anes draca bæclinge and hine þær helle sealde on anweald to habbene aa buten ænde."
Eala mæn, hwu grislic hit wæs þa-þa seo deo[Fol. 98b]fellice helle þone feond, Beelzebub, underfeng and hine fæste geheold! For-þan se deofol wæs ær þære helle hlaford and eallra þære deofellicre þingen þe hire on wæron.
"Þa cwæð seo helle: 'La þu ealdor eallra forspillednysse, for hwy dyrstlæhtest þu þone Hælend to nymene and on þa Iudeas besændest
