116
0, TIBBIE, I HAE SEEN THE DAY.
Words by Burs. Air_"Invercauld's Reel." Keynote G.
0, TIBBIE, I hae seen the day
Ye wadna been sae shy;
For lack o' gear ye lightly me,
But troth I carena by.
Yestreen I met you on the moor,
Ye spak' na, but gaed by like stoure,
Ye gock at me because I'm poor,
But feint a hair care I.
0, Tibbie, &c.
I doubt na, lass, but ye may think,
Because ye hae the name o' clink,
That ye can please me at a wink,
Whene'er ye like to try.
O, Tibbie, &c.
But sorrow tak' him that's sae mean,
Although his pouch o' coin were clean,
Wha follows ony saucy queen,
That looks sae proud and high.
O, Tibbie, &c.
Although a lad were e'er sae smart,
If that he want the yellow dirt.
Ye'll cast your head anither airt,
And answer him fu' dry.
0, Tibbie, &c.
But if he hae the name o'gear,
Ye'll fasten to him like a brier,
Tho' hardly he, for sense or lear,
Be better than the kye.
0, Tibbie, &c.
But, Tibbie, lass, tak' my advice, -
Your daddie's gear makes you sae nice,
The deil a ane wad speir your price,
Were ye as poor as I.
0, Tibbie, &c.
There lives a lass in yonder park,
I wadna gie her in her sark,
For thee, wi' a' thy thousand mark
Ye need na look sae high.
0, Tibbie, &c.
