Sae will we yet (Stirling)/Tam Glen
TAM GLEN.
My heart is a-breaking, dear tittie,
Some counsel unto me come len’;
To anger them a’ is a pity,
But what will I do wi’ Tam Glen;
I’m thinking wi’ sic a braw fallow,
In poortith I might mak a fen’;
What care I in riches to wallow,
If I mauna marry Tam Glen.
There’s Lowrie, the laird o’ Drummeller,
“Gude-day to you,” brute, he comes ben;
He brags, and he blaws o’ his siller,
But whan will he dance like Tam Glen?
My minnie dues constantly deave me,
And bids me beware o’ young men;
They flatter, she says, to deceive me;
But wha can think sae o’ Tam Glen?
My daddie says, gin I’ll forsake him,
He’ll gie me good hundred marks ten;
But if it’s ordain’d I maun take him,
O wha will I get but Tam Glen?
Yestreen at the valentines dealing,
My heart to my mou’ gied a sten,
For thrice I drew ane without failing,
And thrice it was written, Tam Glen.
The last hallowe’en I was waukin’,
My droukit sark-sleeve, as you ken,
His likeness cam up the house staukin’,
And the very grey breeks o’ Tam Glen.
Come counsel, dear tittie, don’t tarry;
I’ll gie you my bonnie black hen,
Gif you will advise me to marry
The lad I loo dearly, Tam Glen.