The fables of Aesop by William Caxton (Jacobs)/Vol. II/Auian/Fable 19
¶ The xix fable is of the lyon and of the gote
e is wyse that can kepe hym self
from the wyly and fals / as hit
appereth by this fable / Of a lyon /
whiche ones mette with a gote /
whiche was vpon a montayne
And whanne the lyon sawe her / he sayd to her
in this manere / For to gyue to her occacion to
come doune fro the hylle / to thende that he
myght ete her / My suster why comest thow not
hyder on this fayre and grene medowe for to ete
of these fayre herbes or grasse / And the gote
ansuerd to hym / How be hit / that thow sayst
trouthe / Neuertheles thow sayst it not / neyther
for my wele ne for my prouffyte / but thow sayst
hit / by cause that thow woldest fayne ete and
deuoure me / but I truste not in thy fayre speche /
For many tymes I haue herd saye of my graūt
moder / he that is wel / meue not hym self / For
he whiche is in a place wel sure / is wel a fole to
go fro hit / and to putte hym self in grete daunger
and perylle