The fables of Aesop by William Caxton (Jacobs)/Vol. II/Auian/Fable 3
¶ The thyrd fable is of the two Creuysses
E whiche will teche and lerne some
other / ought first to corryge &
examyne hym self / as it appereth
by this fable of a creuysse / whiche
wold haue chastysed her owne
doughter bicause that she wente not wel ryght /
And sayd to her in this manere / My doughter /
hit pleaseth me not that thow goost thus backward
/ For euylle myght wel therof come to the /
And thenne the doughter sayd to her moder My
moder I shalle go ryght and forward with a good
will but ye must goo before for to shewe to me
the waye / But the moder coude not other wyse
goo / than after her kynd / wherfore her doughter
sayd unto her / My moder fyrst lerne your self
for to goo ryght and forward / and thenne ye
shalle teche me And therfore he that wylle teche
other / ought to shewe good ensample / For grete
shame is to the doctour whanne his owne coulpe
or faulte accuseth hym