The fables of Aesop by William Caxton (Jacobs)/Vol. II/Auian/Fable 9
¶ The ix fable maketh mencion of the two pottes
He poure ought not to take the
Ryche as his felawe as it appiereth
by this fable of two pottes /
of the whiche the one was coper /
and the other of erthe / the whiche
pottes dyd mete to gyder within a Ryuer / ¶ &
by cause that the erthen pot wente swyfter than
dyd the coper potte / the pot of coper sayd to
the pot of erthe / I praye the that we may goo
to gyder / And the erthen potte ansuerd and
sayd to the coper pot / I wylle not go with the /
For it shold happe to me as it happed to the
glas and of the morter For yf thow sholdest
mete with me / thow sholdest breke and putte
me in to pyeces / ¶ And therfore the poure is
a fole that compareth and lykeneth hym self to
the ryche and myghty / For better is to lyue in
pouerte than to deye vylaynously and oppressyd of
the ryche