The fables of Aesop by William Caxton (Jacobs)/Vol. II/Auian/Fable 10
¶ The x fable is of the lyon and of the boole
T is not alweye tyme to auenge hym
self of his enemye / As it appiereth
by this fable, of a bole / whiche
somtyme fledde before a lyon /
And as the bole wold entre within
a cauerne for to saue hym / a gote wente
geynste hym for to kepe and lette hym that
he shold not entre in it / to whome the bole
sayd / It is not tyme now to auenge me on the /
for the lyon that chaseth me / but the tyme shalle
come that wel I shalle fynde the / For men
ought not to doo to hym self dommage for to
be auengyd of his enemy / but oughte to loke
for tyme and place couenable for to doo hit