Evangelium Secundum Mattheum: the Gospel of Saint Matthew in West-Saxon/Chapter 4

CAPUT IV

Đys godspel sceal on hālgandæg.

1. Đā wæs sē Hǣlend gelǣd fram Gāste on wēsten þæt hē wǣre fram dēofle costud.^[1]

2. And þā þā hē fæste fēowurtig daga and fēowurtig nihta, þā ongan hyne syððan hingrian.^[2]

3. And þā genēalǣhte sē costniend, and cwæð, Gyf þū Godes Sunu sȳ, cweð þæt þās stānas tō hlāfe gewurðon.^[3]

4. Ðā andswarode sē Hǣlend, Hit ys āwriten, Ne leofað sē man be hlāfe ānum, ac be ǣlcon worde þe of Godes mūðe gǣð.^[4]

5. Þā gebrōhte sē dēofol hine on þā hālgan ceastre, and āsette hine ofer þæs temples hēahnesse,^[5]

6. and cwæð tō him, Gyf þū Godes Sunu eart, āsend þē þonne nyðer; sōþlīce hit ys āwriten, Þæt hē his englum bebēad be ðē, þæt hig þē on hyra handum beron, þē lǣs þe ðīn fōt æt stāne ætsporne.^[6]

7. Ðā cwæð sē Hǣlend eft tō him, Hit ys āwriten, Ne costna þū Drihten þīnne God.^[7]

8. Eft sē dēofol hine genam, and lǣdde hine on swīðe hēahne munt, and ætēowde him ealle middaneardes rīcu and hyra wuldor,^[8]

9. and cwæþ tō him, Ealle þās ic sylle þē, gyf þū feallende tō mē geēadmētst.^[9]

10. Ðā cwæð sē Hǣlend tō him, Gang þū sceocca on bæc; sōþlīce hit ys āwriten, Tō Drihtne þīnum Gode þū ðē geēaðmētsð, and him ānum þēowast.^[10]

11. Ðā forlēt sē dēofol hine, and englas genēalǣhton and him þēnodon.

Dys [godspel] sceal on frīgedæg ofer twelftadæg.

12. Sōðlīce þā sē Hǣlend gehȳrde þæt Iohannes belǣwed wæs, þā fērde hē tō Galileam;

13. and forlǣtenre þǣre ceastre Nazareth, hē cōm and eardode on Capharnaum, on þām sǣgemǣrum, on endum Zabulon and Neptalim:

14. þæt wǣre gefylled þæt ðe gecweden wæs þurh Esaiam þone wītegan,^[11]

15.^[12]

16. Ðēoda folc ðe on þȳstrum sæt geseah mycel lēoht, and sittendum on earde dēaþes sceade is lēoht ūp āsprungen.^[13]

17. Syððan ongan sē Hǣlend bodian and cweðan, Dōð dǣdbōte; sōðlīce heofona rīce genēalǣcð.^[14]

Ðis godspel sceal on Andreas mæssedæg.

18. Þā sē Hǣlend ēode wið ðā Galileiscean sǣ,^[15] hē geseh twēgen gebrōðru, Symonem, sē wæs genemned Petrus, and Andream his brōþor, sendende hyra nett on þā sǣ; sōðlīce hī wǣron fisceras.^[16]

19. And hē sǣde him, Cumað æfter mē, and ic dō þæt gyt bēoð manna fisceras.^[17]

20. And hī þǣrrihte forlēton hyra net, and him fyligdon.^[18]

21. And þā hē þanon ēode, he geseh twēgen ōðre gebrōþru, Iacobum Zebedei and Iohannem his brōþur, on scype mid hyra fæder Zebedeo, rēnigende hyra nett, and hē clypode hī.^[19]

22. Hī ðā sōna forlēton hyra nett and hyra fæder, and him fylidon.^[20]

Ðis [godspel] sceal on frīgedæg on þǣre þryddan wucan ofer twelftandæg.

23. And þā befērde sē Hǣlend ealle Galileam, lǣrende on hyra gesomnungum; and hē wæs bodiende godspel þæs rīces, and hǣlende ǣlce ādle and ǣlce untrumnysse on þām folce.^[21]

24. And ðā fērde hys hlīsa intō ealle Syriam; and hī brōhton him ealle yfel hæbbende missenlīcum ādlum and on tintregum gegripene, and þā ðe dēofelsēocnyssa hæfdon, and mōnoðsēoce, and laman, and hē þā gehǣlde.^[22]

25. And him fyligdon mycele menigu fram Galilea, and fram Decapoli, and fram Hierusalem, and fram Iudea, and fram begeondan Iordanen.^[23]

1. A, costnod (n above the line).
2. A, feowertig (twice).
3. Corp., costnind (costni-nd, divided at the end of the line), A, B, costnigend; A, geweorðon.
4. A, hælend him; A, ælcum.
5. A, heahnysse.
6. A, om. hyra; A bæron; A þe læs ðe.
7. A, costa (changed into costna); A, ða na drihten.
8. A, ætywde; A, middangeardes ; A, heora.
9. A, om. to him; A, geeadmedest.
10. A sceucca; A, geeadmedest, B, geeaðmestð.
11. A, om. ðe.
12. 15. Corp., A, B, om. entire verse.
13. A, geseh; A, gearde; B, scade.
14. A, heofena.
15. A, iude (for eode); A, galileiscan.
16. A geseah; A gebroðra; A broðer; A heora.
17. A, heom.
18. A, þarrihte; A heora; A, folgodon, B fylidon.
19. A, broðer; A, myd heora; Corp., A, B, remigende; A, heora; B, net.
20. A, heora (twice); A, folgodon.
21. A, heora; A, bodigende godspell.
22. A, deofolseocnysse, B, deofolseocnessa; A, monaðseoce.
23. A, mænigeo.