xxo. Ao. Thys yere Alionor Cobhame conspyryd the kynges deth by the concell of master Roger clarke and nigromancer, the wyche Alionore was put by the kynge and hys justys to perpetuall prisone; and on sent Arkynwoldes evyne she went a fote to Powlles in blacke, with a taper in hare hande, lede betwene two knyghttes. And in the same wyse on the morrow she went unto crystcherche.[1]
xxjo. Ao. Thys yere the lorde Talbot came in to Ynglond and was made erle of Shrowsbery and amyralle of the see. And sir Christofor Talbot was falsely slayne at Callys.
xxijo. Ao. Thys yere the byshoppe of Bathe[2] was made chanceler of Englond and archebychopp of Canterbery. And the lord Fanoppe dyde this yere, and is burryd in hys chappell that he made in the freeres precheres.[3]
xxiijo. Ao. Thys yere on Candelmas evyne was gret thunder and tempest, that Powlles stepulle on the sowth-west syde mervelusly was sett a fyer, and the stepull of Kyngstone up Temse brent, and many men slayne. And qwene Margaret was crownyd. And the parlament that yere at Byrry.
xxvo. Ao. Thys yere was a fyghtynge in Smythfelde betwene ane armerar of fletstret and his servant for worddes ayenst the kynge wherof hys servant apelyd hym; and the servant slew the master in the felde. And this yere the duke of Gloceter dyde at Byrry in the parlament tyme there. And this yere John Chalons sqwere, sonne of Roberte Chalons knyght of Ynglond, fowth in France with the lorde Boyles brother, and John Chalons slew hym in the felde. And thys yere was juggyd to be drawne, hungyd, but they ware but drawne, Chamberlyn, Myddyltone, Artoys, Herberd, and Nedeham; but whane they ware drawne they had ther pardone all and their lyffes.
xxvjo. Ao. Thys yere the kynge made two dukes, of Norfolke and Suffoke. And this yere the watter of the Temse by excesse
