42. And þēah manega of ðām ealdron gelȳfdon on hyne; ac hī hit ne cȳddon, for þǣra Pharisea þingon, þē lǣs hig man ūt ādrife of hyra gesomnunge.[1]
43. Hī lufodon manna wuldor swīðor þonne Godes wuldor.[2]
44. Sē Hǣlend clypode and cwæð tō him, Sē þe gelȳfað on mē, ne gelȳfþ hē nā on mē, ac on þone þe mē sende.[3]
45. And sē ðe mē gesyhþ gesyhð þone þe mē sende.[4]
46. Ic cōm tō lēohte on middaneard, and nān ðāra þe gelȳfð on mē ne wunað on þȳstron.[5]
47. And gif hwā gehȳrð mīne word, and ne gehylt, ne dēme ic hine; ne cōm ic middaneard tō dēmanne, ac þæt ic gehǣle middaneard.[6]
48. Se þe mē forhigð, and mīne word ne underfēhð, hē hæfþ hwā him dēme; sēo spǣc þe ic spæc, sēo him dēmð on þām ȳtemestan dæge.[7]
49. For þām þe ic ne spece of mē sylfon; ac sē Fæder þe mē sende, hē mē bebēad hwæt ic cweþe, and hwæt ic spece.[8]
50. And ic wāt þæt his bebod ys ēce līf; þā þing þe ic sprece ic sprece swā Fæder mē sǣde.[9]
- ↑ A, B, C, þeh (for þeah); A, cyðdon; A, þy læs; Corp., hig ma; B, C, hi ma, A, hig man; A, heora.
- ↑ A, lufedon.
- ↑ B, clypo (for clypode); Corp., A, B, C, þæne.
- ↑ Corp., A, B, C, þæne.
- ↑ A, þæra; A, þystrum.
- ↑ A, myddangeard (second time).
- ↑ A, forhygcð; A, spræc þe ic spræc.
- ↑ A, B, C, sprece; A, sylfum; A, sprece.
- ↑ A, þas þyng.
